Sighint is interventos in sa costa de su Sinis programmados dae s’Amministratzione Abis. Sunt comintzados dae pagas dies is traballos pro torrare a fàghere su ponte de linna de Mari Ermi, pro pònnere un’istrutura noa.
“Sighit sena de si firmare s’operatzione de cunservatzione e manutentzione de is litorales portada a dae in antis dae s’ Àrea Marina Proteta. Custa borta ponimus manu a torrare a fàghere a nou su ponte pedonale de linna de Mari Ermi. Una mesura pro s’ambiente ma unu servìtziu de importu pro totu is utentes de sa plaja, a manera particulare pro is prus disfortunados” at naradu su Sìndigu Andrea Abis.
S’interventu, in càrrigu a is ufìtzios de s’Àrea Marina Proteta Penìsula de su Sinis – Ìsula de Malu Bentu, si faghet sighende sa programmatzione de manutentzione istraordinària de is passerellas de su litorale pro 90.000,00 èuros, chi benint in parte dae su bilàntziu comunale e in parte dae unu finantziamentu ispetzìficu de su Ministeru de s’Ambiente e de sa Seguresa Energètica.
“Su ponte nd’at a èssere betadu e torradu a fàghere a nou, lassende totu sa longària sua de 65 metros – at ispiegadu s’Assessore a is Traballos Pùblicos Enrico Giordano -. “Pro non fàghere dannu meda a s’ambiente e tutelare sa laguna, s’at a impreare una tècnica de fràigu diversa dae cussa de in antis, ca is palos ant a èssere apogiados e non fichidos in su fundale, dende un’istrutura prus istàbile”.
Totu su traballu at a èssere fatu respetende e defensende is animales chi ddoe sunt, a manera particulare su fratino.
(M.G.S.)