Tharros e museu, si torrat a is livellos de su 2019

Image: 

 

 

Creschet su nùmeru de is bisitadores in is sitos archeològicos de su Sinis. Soddisfatzione de su  presidente de sa Fundatzione Mont’e Prama Anthony Muroni e de su Sìndigu de Crabas Andrea Abis.

Sa Fundatzione Mont’e Prama podet abbaidare cun otimismu a su tempus chi at a bènnere pro is sitos archeològicos. Is datos de is presèntzias in is dies de is festas de Pasca, torrados a is livellos de in antis de sa pandemia, faghent isperare bene meda pro s’istiu e pro totu is apuntamentos in programma. Pròpiu sa chida passada in sa BIT de Milanu sunt istados lantzados duos apuntamentos de importu comente su Fèstival de s’Archeologia in programma dae su 28 de làmpadas a su 3 de trìulas.

Sunt istadas 2.428 is persones chi in sa die a pustis de Pasca ant seberadu unu de is tres sitos chi si podent visitare: Tharros, Museu Giovanni Marongiu e Turre ispagnola. In su 2019 fiant istados 2345.  In sa die de Pasca sunt istados imbetzes 639 contras a is 777 de su  2019. Unu datu duncas de cunfirma a pustis de duos annos difìtziles meda pro su setore cando is sitos fiant abarrados serrados.

S’àrea de Tharros, fintzas in su 2022, sighit a èssere visitada dae gente meda cun 289 presèntzias in sa die de Pasca e 1066 su lunis de s’Ànghelu. Bene prus che totu in custa ùrtima die fintzas su Museu e sa Turre cun rispetivamente 693 e 669 intradas.  

Semus assistende a una ripresa de is nùmeros chi cunfirmant su valore mannu de atirare sa gente chi tenent is sitos culturales nostros, prendas de unu territòriu chi tenet cosas meda de ofèrrere e chi est disigiadu meda dae bisitadores e turistas meda. Cun sa Fundatzione semus traballende meda pro sa promotzione internatzionale de unu patrimòniu culturale e monumentale ùnicu, chi est un’asse de fundamentu pro s’isvilupu culturale e econòmicu de Crabas” narat su Sìndigu Andrea Abis.

Pro su presidente de sa Fundatzione Mont’e Prama Anthony Muroni “Si tratat de datos positivos chi nos permitint de abbaidare a in antis a cara a resurtados noos e de importu. Chèrgio fàghere is cumplimentos a su Comune de Crabas e a sa Cooperativa “Penisola del Sinis” – narat ancora Muroni – custos datos sunt mèritu de sa resistèntzia e de is isfortzos issoro pro mantènnere bia una realidade ispetziale. Como traballamus paris pro chi is nùmeros potzant crèschere semper prus”.

(M.G.S.)

 

Tipo di notizia: 
notizie