Su situ de Sa Osa

Image: 

 

 

Chircas archeològicas reghentes fatas intre su mese de austu  2008 e su mese de nadale 2009 in localidade Sa Osa, connota fintzas comente Serra ‘e Siddu, ant bogadu a campu una filera de insediamentos de interessu mannu; is primos sunt de s’edade de su Ràmene (III millènniu a.C.), ma chi sighint prus che totu in su tempus de is nuraghes, dae s’edade de su Brunzu mèdiu (1700-1365 a.C.) finas a sa prima edade de su Ferru (IX-metade VIII sec. a.C.).

Su situ est in sa piana de su Campidanu Majore a giai 2 chilòmetros dae sa lìnia de costa de su Golfo de Aristanis e a giai 500 metros dae s’ispunda destra de su frùmene Tirsu, ocupende unu montigru piticu de orìgine alluvionale chi imbatet finas a 6 metros subra su livellu de su mare e chi diminuit  a sud a cara a sa badde de su frùmene, su chi ddi narant bennaxi. Su logu est a 200 metros dae S’Arrieddu, in ue dae tempus meda sunt connotos un’insediamentu de cultura Otieri (IV millennio a.C.) e una tumba a cista lìtica de facies Campaniforme-Bonnànaro (fine III-comintzu II millènniu a.C.).

Sa prima ocupatzione de su situ in s’edade de su Ràmene est rapresentada dae unu villàgiu pre-nuràgicu de facies sub-Otieri, chi si distinghet pro is domos interradas. Is depòsitos archeològicos ant torradu restos de pastos comente ossos de animales de ispètzies meda e conchìgios de molluscos de mare, tzeràmicas lìsias e decoradas, istrumentos de ossu e de perda in ossidiana.

Sa presèntzia umana in s’edade de is nuraghes si dividet a su nessi in tres fases. Sa prima, chi pertocat su Brunzu mèdiu (1700-1365 a.C.), est atestada dae domos interradas, assimigiantes a cussas in usu in su tempus pre-nuràgicu. Su villàgiu nàschidu in s’àtera fase de su Brunzu reghente (1365-1200 a.C.) si distinghet pro sa presèntzia de putzos meda iscavados a faca a domos in carchi casu interradas, in àteros frunidas de unu muru de basamentu. In unu de custos putzos, profundu giai 5 metros, in prus de restos de tzeràmica e ossos de animales, ant agatadu fintzas sèmenes de àghina e de figu.

Custu datu est de importu mannu ca rapresentat s’atestatzione prus antiga de sa coltivatzione de sa bide in Sardigna. Su villàgiu nuràgicu de su Brunzu finale-prima edade de su Ferru (XII-VIII sec. a.C.) est atestadu finas a como ebbia dae is putzigheddos-silos, profundos giai 2 metros, dotados in s’imbucu de ghiera tunda ricavada in una lastra de arenària. In s’economia de is pòpulos de is nuraghes insediados in Sa Osa sunt de importu mannu, in base a is restos de animales agatados in is depòsitos archeològicos, is atividades de s’allevamentu, de sa catza e de sa pisca.

(M.G.S.)                                      

 

Tipo di notizia: 
notizie