Su Comune donat a is òspites de una domo de riposu mantigheddas pro callentare is ancas e mantas fatas dae Liana Musiu

Image: 

 

 

S’Amministratzione Abis, cun proposta de s’Assessoradu a is Polìticas sotziales, sanitàrias e assistentziales, at patrotzinadu su progetu de sa sennora Liana Musiu pro fàghere mantigheddas pro callentare is ancas e mantas de donare a is òspites de una domo de riposu.

In sa mangianada de su 3 de maju su Sìndigu Andrea Abis, s’Assessora a is Polìticas sotziales, sanitàrias e assistentziales Laura Celletti e su Cussigeri delegadu a is Assòtzios Ferdinando Sechi, ant acumpangiadu a Liana Musiu a sa domo de riposu Eleonora d’Arborea de carrera Vandalino Casu in Aristanis, pro cunsignare is mantas fatas a manu a is antzianos.

“Amus atzetadu cun praghere s’invitu de sa cuntzitadina nostra, dende su contributu pro comporare su materiale, pro portare a cumprimentu un’atu de generosidade chi est istadu apretziadu meda dae is sennoras chi istant in sa domo de riposu. Amus chèrridu partetzipare ativamente a is netzessidades issoro e sa cuntentesa chi nos ant mustradu permitit de cumprèndere cantu siat de importu a dare a is antzianos s’atentzione giusta, fintzas cun sinnos de donos gratùitos comente cussu de Liana” at naradu s’Assessora Laura Celletti.

S’impignu de Liana Musiu, crabarissa, ex cummertziante in pensione, comintzat in su 2017 cando benit a ischire pro mèdiu de unu servìtziu de rete sotziale de s’atividade de unas cantas fèminas chi, unende is fortzas, resurtaiant a imbiare mantas e issallos a is persones bisongiosas de totu s’Itàlia, pro esempru a is populatziones terremotadas.

“A pustis de s’agiudu a is abitantes de Tolentino, corpidos dae su terremotu de su 2016, amus detzisu de traballare a manera semper prus organizada, ponende.nos obietivos e preparende cun tempus su chi bisongiaiat pro is mantas de imbiare – narat sa sennora Liana -. Dae santugaine dae sa pàgina Facebook mia mi òcupo de coordinare su grupu de voluntàrias chi traballant paris cun megus e chi mi agiuant puru a agatare sa lana. Apo cunsignadu dae pagu tempus a totu is domos de riposu de is biddas corpidas dae is fogos de s’istiu passadu, est istadu emotzionante”. 

Su traballu de Liana Musiu, paris cun su grupu Facebook SenzafrontierePerAmare e de fèminas meda de totu s’Itàlia, tenet bisòngiu de donatziones meda. Su Comune de Crabas at atzetadu s’invitu e eris is mantas e is isciallos colorados sunt istados cunsignados a is fèminas reconnoschentes de sa domo de riposu de Aristanis.

(M.G.S.) 

 

 

Tipo di notizia: 
notizie