Su Comune de Crabas s’agiùdicat un’àteru bandu de su PNRR: immoi pro s’infàntzia ant a arribare 4 milliones de èuro

Image: 

 

 

Su Comune de Crabas s’at agiudicadu un’àteru bandu de su PNRR, custa borta de 1,31 milliones de èuro,  pro torrare a fàghere e ismanniare s’iscola de s’infàntzia de carrera De Gasperi.

“Est un’àtera notìtzia istòrica pro Crabas, pro su sistema iscolàsticu, pro is pitzinnos e is pitzinnas.

Custu bonu resurtadu prèmiat s’operosidade de s’amministratzione e is ufìtzios ant crètidu in un’obietivu chi pariat impossìbile de ddoe pòdere arribare -. at decraradu su Sìndigu Andrea Abis – Su progetu cumpletat  totu s’ammodernamentu de is istruturas iscolàsticas pro s’edade chi andat dae 0 a 6 annos”.

Is ùrtimas resursas de su PNRR otènnidas s’agiunghent a cussas de s’asilu nido comunale de carrera Amsìcora, cun 1,14 milliones e a cussas de s’iscola de s’infàntzia de pratza Muscas in Solanas, pro 1,53 milliones, pro unu totale de giai 4 milliones de èuro, totu riservados  a sa fàscia de edade 0 - 6 annos.

Su progetu de s’iscola de carrera De Gasperi previdet s’efitzientamentu energèticu e tecnològicu de su locale e sa realizatzione de logos in intro e in foras noos bellos meda, est a nàrrere àulas, laboratòrios e giardinos. 

“Sa punna, a sa fine de custos traballos, at a èssere cussa de torrare unu logu agìbile e funtzionale pro is esigèntzias de s’oferta formativa e de su benèssere de is pitzinnos e de is pitzinnas-. At agiuntu s’Assessore a is Traballos Pùblicos Enrico Giordano – Fintzas a foras su progetu previdet de otènnere logos adeguados e atraentes pro is atividades de giogu e motòrias e  àreas birdes, prantende prantas froridas, àrbores umbrosos, unu pamentu de gomma in is logos in ue giogant is pitzinnos”. 

Sa programmatzione de su PNRR pro is iscolas de Crabas est su cumpletamentu giustu de su programma #AScuolaSicuri, aviadu in su 2020 dae s’Amministratzione comunale pro pònnere in seguresa is iscolas. 

In fatis s’iscola de s’infàntzia de carrera De Gasperi fiat istada torrada a abèrrere gràtzias a sa summa de 185 mìgia èuro, chi at resu disponìbile fintzas su servìtziu agiuntivu de sa mensa cun coghina a chilòmetru zero pro totu is alunnos e alunnas de Crabas. 

“S'agiudicatzione de su bandu PNRR pro s’iscola materna de carrera De Gasperi cheret nàrrere pro sa comunidade iscolàstica nostra un’àteru motivu de isvilupu. S’ant a pòdere fàghere totu cussas òperas, isetadas meda, chi ant a èssere un’oportunidade manna de crèschida sotziale –. Ispiegat su Cussigeri Delegadu a s’Istrutzione Nando Sechi - Is pitzinnos, is mastros e s’àteru personale ant a pòdere operare in logos prus adatos a is esigèntzias educativas e prus cunfortèvoles, elementos  de importu pro s’acostare mègius a s’aprendimentu. Is genitores ant a èssere seguros chi is fìgios issoro ant a pòdere bìvere s’esperièntzia issoro de dischentes in seguresa e serenidade”.

(M.G.S.)  

 

Tipo di notizia: 
notizie