Solanas - Novas istòricas

Image: 

 

 

Solanas est nàschida in unu logu populadu meda giai in època fenìtzia ca faghiat parte de su territòriu de Tharros, bidda de importu mannu chi fiat a pagu tretu a canta a mare. In su Medioevu, Solanas, fiat una biddighedda chi si naraiat “Salanis”. In cussu tempus sa bidda faghiat parte de sa  Curadoria  de su Campidanu Majore o de Crabas. A su comintzu de su sèculu XI, cando bi fiat su Giudicadu de Arborea, a su giùighe Gonariu  Comita de Gunale ddi naraiant “De Salanis” pro inditare sa provenièntzia dae custa bidda. Sa bidda (“villa”- bidda) de Solanas, aiat risentidu bortas meda de is sortes de sa bidda a canta, de Crabas.

In s’annu 1324 naschet su Regnu de Sardigna, unidu a sa Corona de Aragona, in unu primu tempus alleadu e a pustis inimigu de su Regnu de Arborea. Is rapresentantes de Solanas aiant pigadu parte a sa “Corona de sa Curadoria” e in su 1388 aiant firmadu sa  paghe intre is duos istados in gherra, ma est istada una paghe durada pagu tempus. In s’annu 1410  Solanas  fiat diventada una bidda pitica de su Regnu Catalanu-Aragonesu de Sardigna. A pustis, is tzentros chi faghiant parte de sa Curadoria de su Campidanu Majore, paris a cussos de is Curadorias de su Campidanu de Simaghis e de su Campidanu de Milis fiant intrados in su  Marchesadu de Aristanis e fiant istadas tzèdidos a Lenardu Cubello. A pustis de sa fine de sa famìllia Cubello, in su 1470, su Marchesadu de Aristanis fiat passadu a Lenardu de Alagon de s’istirpe de is ùrtimos giùighes de Arborea  ma dd’est istadu cunfiscadu su 15 de santandria de su 1477 a pustis de sa rebellia sua a su Viceré aragonesu Niccolò Carros  de Arborea.  

Custu ùrtimu si fiat mòvidu pro chi  Giuanne II de Aragona esseret cundennadu a Lenardu Alagon pro is delitos de lesa maestade e fellonia. Su feudatàriu sardu, in custa manera, aiat provocadu una briga chi – a su comintzu – aiat bidu is aragonesos inserrados in Casteddu e in S’Alighera,  in unu segundu tempus, cun sa batalla a canta a  Macumere de su 19 de maju 1478 cando is rebelles sardos sunt istados iscunfitos. Lenardu de Alagon, cun is pagos fideles abarrados si nche fuit a Bosa cun s’intentu de andare a Gènova, ma ddu faghent presoneri in mare e ddu cunsignant a s’ammiràlliu catalanu-aragonesu Giovanni  Vilamarì chi nche ddu leat a Valenza, in sa presone de  Xativa, in ue abarrat presoneri finas a sa morte in su 1494. A pustis de is rechestas de is tzitadinos de Aristanis de lassare su fèudu unidu,  in su 1479, Ferdinandu su Catòlicu, chi aiat leadu su tìtulu de Marchese de Aristanis, aiat unidu - una borta pro totu – su fèudu a su Patrimòniu reale, istituende sa càrriga de  “arriccidori" de su Marchesadu de Aristanis. In edade moderna  Solanas at tentu atacos meda dae is piratas chi fiant imbàtidos a su Campidanu pro fàghere incursiones.

In su 1647 ddu aiat istadu un’invasione manna de tzilibirches chi aiat fatu dannu meda a s’economia de su logu. In su 1652 sa bidda est istada corpida dae sa peste. Pro totu custas disgràtzias Solanas at arriscadu s’ispopulamentu,  ma sa fortza de ànimu de is abitantes at permìtidu a sa comunidade de abarrare in sa bidda. In s’annu 1767 Solanas fiat giai intrada a fàghere parte de su Marchesadu de  Aristanis – de propiedade de su Marchese de Arcais Damianu Nurra – a issu depiant versare tassas e tributos – Custas conditziones noas non fiant favorèvoles meda pro Solanas e pro totu is biddas de is tres  Campidanos (Crabas, Milis, Simaghis) tantu chi is abitantes si fiant  refudados de pagare is tributos feudales. 

Passende is annos, dae su 1780 a su 1785, is rechestas de àteras tassas a sa gente fiant semper prus pressantes, faghende nàschere protestas meda e malumores. Sa gente  fiat opressa e deviat pagare, pro fortza, is deretos baronales. In su mese de austu de su 1789, is abitantes de sa “villa” de Solanas, fèudu de su Marchese de Arcais, si fiant refudados de pagare e de cunsignare is deretos baronales in is “magasinos feudales”. Cando, cun sa fortza, est istadu impostu su pagamentu de is tributos, giai otanta abitantes de Solanas, òmines e fèminas, rebellende.si, aiant obligadu is sordados a si ritirare e a suspèndere cale si siat atzione contra de issos. S’esempru de Solanas fiat istadu sighidu, mancari a manera prus patzìfica, fintzas dae sa gente de Donigala. S’atu de rebellia de is solanesos non fiat abarradu sena de pena: is capos de su movimentu populare Frantziscu Enna, Vincenzo Muscas, Giuanne Marras e Luisi Ligia aiant pagadu cara sa rebellia contra de su Re, tantu chi su primu fiat istadu cundennadu a deghe annos de presone, su segundu a chimbe e totu is àteros a tres annos. A sa morte de su Marchese Damianu Nurra  su fèudu fiat passadu a su nebode Frantziscu Flores chi ddu aiat riscatadu, pro semper, in su mese de maju de su 1838. 

Cun su Decretu Règiu nùmeru 19 de su 5 de ghennàrgiu 1928 su Comune de Solanas est istadu unidu a cussu de Crabas e est diventadu fratzione sua.

(M.G.S.)

Tipo di notizia: 
notizie