Santu Srabadoi est in sa biddighedda. Si rennoat su ritu de sa Cursa de is Iscurtzos.

Image: 

 

 

Is “curridoris” ant trasportadu currende s’istàtua de Santu Srabadoi finas a sa biddighedda omònima. Chentinas de partetzipantes e una folla de ispetadores ant animadu dae mangianu chitzo is istradas tzitadinas e is carreras de campagna.

Sa Cursa de is Iscurtzos in prus de una cummovente rievocatzione istòrica e religiosa de sa defensa de s’istàtua de su Santu dae s’invasione de is Moros, est pro sa gente de Crabas unu momentu de importu de fide e de identidade comunitària. Pro su 2022, sa cursa, inserida in intro de sa festa pro Santu Srabadoi est organizada dae su Comune de Crabas cun s’agiudu de s’Assessoradu a su Turismu de sa Regione Sardigna, de Sardigna Turismo, de su Comitadu organizadore Santu Srabadoi 2022, de s’Assòtziu Is Curridoris, de s’Assòtziu Santu Srabadoeddu e de s’Assòtziu Entes Locales pro s’Ispetàculu. Giai otighentos fideles iscurtzos, cun s’àbidu biancu, a pustis de sa missa de is 6 de su mangianu tzelebrada dae s’Archipìscamu Muns. Roberto Carboni, ant mòvidu dae sa Crèsia Parrochiale de Santa Maria Assunta de Crabas in diretzione carrera Tharros pro sa partèntzia. Ammuntada sa teca chi amparat s’istàtua, totus ant isetadu sa boghe de bonu augùriu  de "tziu Antoni Obinu", unu de is prus antzianos de sa cursa: "Baxi in nomine 'e Deus!".

S’emotzione, a pustis de duos annos de firmada, est istada meda, meda sa gente cummòvida siat intre is curridoris, siat intre is ispetadores chi dae su mangianu chitzo ant comintzadu a ocupare ogni giassu lìberu in is istradas de sa bidda in ue passaiat s’esèrtzitu de paghe de Santu Srabadoi.

“Oe amus torradu a fàghere su chi ischimus fàghere mègius: cùrrere pro Santu Srabadoi. Amus partetzipadu in otighentos e cras isperamus chi su nùmeru crescat” at naradu Alessio Camedda, su presidente de s'Assòtziu Is Curridoris, cando ant dadu is gravellos beneitos, chi ogni priore cunsignat a is cumponentes de su grupu suo comente unu de is sìmbulos de sa cursa. Una folla de fideles e ispetadores at esortadu is curridoris e at acumpangiadu su Santu in sa prima tapa de su biàgiu de sete chilòmetros chi faghet tra sàbadu 3 e domìniga 4 de cabudanni.

Cummovente meda su passàgiu de is curridoris dae s’asfaltu a s’istrada bianca, in "Su Camminu de su Santu". Una nue de prùere s’est pesada a cara a su chelu e at fatu ancora prus màgica s’esperièntzia de is turistas meda acudidos pro assìstere a una protzessione ùnica. S’arrivu a su santuàriu cun is “tai-tai” (aplàusos) de is fideles, a pustis de un’ora de cursa, at rapresentadu sa fine de sa prima fadiga.

Intre is curridoris fintzas su Sìndigu Andrea Abis. “Amus isetadu meda e su disàgiu est crèschidu in is duos annos de firmada. Sa partetzipatzione manna a custu eventu faghet a cumprèndere chi custa de Santu Srabadoi siat a beru una festa manna de gente in ue totus collaboramus " at naradu a s’arrivu a Santu Srabadoi.

At a èssere festa manna in sa biddighedda, cun sa sagra de su pische de ponte e a sero su cuntzertu de Carla Denule e Massimo Pitzalis.

In ocasione de sa festa in onore de Santu Srabadoi de Sinis, est istada aprontadu unu giassu pro sa susta, illuminadu e custoidu. S’intrada est dae sa Provintziale 7, signaladu cun sa  signalètica verticale (link cun sa mapa parchègios: https://bit.ly/3RccSS4).

Pro motivos de seguresa est  mègius a non lassare is màchinas in s’Istrada Provintziale ma in su parchègiu. Ocannu s’est dadu atentu mannu a is persones cun disabilidades fìsicas chi ant a pòdere bìere sa Cursa de is Iscurtzos in carrera Tharros subra una pedana artziada.

Domìniga si comintzat a is 10.30 cun sa protzessione peri is carreras de sa biddighedda.  A pustis, sa missa, chi s’at a fàghere a is 17.30, in antis de sa partèntzia de sa Cursa previdida pro is 18.30.

Domìniga sero sa festa, e su Santu, si nche trasferint a Crabas cun s’ispetàculu de is fogos de artifìtziu a is 19.30 e su cuntzertu de Gabry Ponte, Aler Ego e dj Andrea Camedda.

In ocasione de sa cursa de domìniga, s’ordinàntzia de su Sìndigu previdet a partire dae is 18.00 e finas a cando ddu est sa netzessidade su divietu de passare a totu is categorias de màchinas in is carreras in ue passat sa protzessione. In su situ de su Comune de Crabas est publicada s’ordinàntzia cumpleta chi pertocat sa tzirculatzione de su tràficu in is dies de sa festa.

Sa Cursa de sa domìniga at a èssere trasmìtida in direta in SuperTv Oristano, Ejatv, e in is pàginas Facebook de su Comune de Crabas, de Laura Laccabadora e in sa pàgina ufitziale de sa Cursa de is Iscurtzos – Festa de Santu Srabadoi.

Sa serrada de sa festa religiosa e tzivile est fissada imbetzes a Santu Srabadoi pro lunis 5 de cabudanni a is 07.00, cun sa Missa e sa torrada de Santu Srabadoeddu, acumpangiadu a Crabas dae is fèminas in costùmene traditzionale.

(M.G.S.)

 

Tipo di notizia: 
notizie