Sa necròpoli de Monte de Prama

Image: 

 

 

Sa necròpoli de Monte de Prama s’agatat in su territòriu de Crabas, in sa base de su montigheddu chi tenet su matessi nùmene,  in s’istrada chi dae Santu Srabadoi andat a Arriora.

S’àrea funerària est istada iscoberta pro casu in su 1974. Su primu interventu de iscavu est istadu fatu in su mese de nadale de su 1975 dae Alessandro Bedini (Subrintendèntzia Archeològica de Casteddu  e Aristanis), chi fiat resurtadu a iscobèrrere una deghina de sepulturas a cista lìtica cuadrada e àteras a putzetu tundu, unas cantas de custas assotziadas a materiales de tzeràmica nuràgicos.

A pustis de s’interventu de urgèntzia fatu in su mese de ghennàrgiu de su 1977 dae Giovanni Lilliu e Enrico Atzeni (Universidade de Casteddu), àteros iscavos sunt istados fatos in su matessi annu e in su 1979 dae Carlo Tronchetti (Subrintendèntzia Archeològica de Casteddu), agiuadu dae  M. Luisa Ferrarese Ceruti (Universidade de Casteddu). Cun s’interventu de su 1977 e de su 1979 fiant istadas iscobertas prus a giosso àteras trinta tumbas alliniadas in un’ùnicu filare dae sud a nord, prus àteras tres postas a est de is ùrtimas tres setentrionales. Is sepulturas, iscavadas in su terrinu, sunt de su tipu a pozzetto subcircolare, cun unu diàmetru dae 60 a 70 cm e una profundidade dae 70 a 80, e ammuntadas dae lastrones cuadrados de arenària gessosa de cm 100 x 100 x 14 de ispessore. Custas fiant sena corredo francu sa tumba 25 in ue ant agatadu unu scaraboide egitizante tipu Hyksos.

S’àrea istudiada in is annos 1977 e 1979 fiat ammuntada dae unu muntone de materiales iscultòreos in ue ddu aiat prus de 4000 cantigheddos de istàtuas e de àteros elementos de arenària gessosa. Is persones interradas fiant òmines e fèminas  e non fiant pitzocheddos. Segundu C. Tronchetti, chi at ghiadu is ùrtimos iscavos, sa necròpoli-santuàriu si ponet subra un’ideale lìnia de cunfine intre logu controlladu dae is Nuràgicos  e is fenìtzios arribados a nou, istabilidos prus a sud in Tharros, e cun custos is raportos non fiant malos.

Mancari is diversas ipòtesi de datatzione, su logu est datadu a su sèculu VIII a.C.

Pro nde ischire de prus: https://monteprama.it/

(M.G.S.)

 

 

Tipo di notizia: 
notizie