S’Ìsula de is Gigantes - Fèstival internatzionale de s'archeologia

Image: 

 

 

A pustis de s'anteprima de Barùmini e de su merie de eris, intra de mùsica e archeologia in Mont’’e Prama, su fèstival internatzionale “S’Ìsula de is Gigantes”, cuncordadu dae sa Fundatzione Mont’’e Prama, sighit oe in su giardinu de su museu “Giovanni Marongiu” de Crabas.

A is oto e mesu de merie at a cumentzare sa cunferèntzia-ispetàculu “Su mare contat: su chi abarrat de sa nave afundada in Malu Entu e su càrrigu pretziadu de cumassas de prumu”. S’addòbiu dd'at a istèrrere e dd’at a ghiare sa giornalista Donatella Bianchi, condusidora de sa trasmissione Rai Lìnia Biaita. Òspite agradèssidu at a èssere su diretore de su Museu Egìtziu de Torinu, Christian Greco.

Ma ddoe at a èssere fintzas mùsica bella, cun Elena Ledda e Simonetta Soro, e su cantu a chiterra de su connotu: sa chiterra est cussa de Bruno Maludrottu, is sonos sunt cussos de Gianuario Sannia, sa boghe sa de Adriano Piredda, Daniele Giallara e Tonino Pira.

Cras a meritzeddu apuntamentu semper in su Museu, a is oto e mesu. S’addòbiu “In biàgiu cara a sa domo noa de is Gigantes” dd’at a presentare su presidente de sa Fundatzione, Anthony Muroni. Intra de is òspites agradèssidos ddoe ant a èssere su diretore de su Neues Museum de Berlinu Matthias Wemhoff e su diretore generale de is Museos de su Ministeru de sa Cultura, Massimo Osanna. At a sonare Pierpaolo Vacca e ant a cantare is poetas Bruno Agus e Diego Porcu, acumpangiados dae su Tenore de Santu Lussurzu.

Su fèstival internatzionale “S’Ìsula de is Gigantes” at a agabbare domìnigu chi benit, 3 de trèulas. Sa direta streaming de is cunferèntzias chi si faghent a merie si podet sighire in s'indiritzu web isoladeigiganti.it, in sa pàgina monteprama.it e in sa pàgina Facebook de sa Fundatzione Mont’’e Prama.

In prus, si podet gosare de is bìsitas ghiadas gratis in su logu archeològicu de Mont’’e Prama. Su logu de is iscavos s’at a pòdere bisitare fintzas a domìnigu.

Finas a eris ddoe fiat ancoras carchi postu lìberu. Pro informos faghet a tzerriare a su nùmeru de telèfonu inditadu dae sa Fundatzione Mont’’e Prama, 379/2765366.

 

A.N.G.

Tipo di notizia: 
notizie