S’Àrea Marina Proteta de su Sinis in Roma in s’atòbiu Valore Natura. S’est discùtidu de su ruolu de is àreas protetas pro sa tutela e s’avaloramentu de s’Itàlia

Image: 

 

 

S’Àrea Marina Proteta Penìsula de su Sinis – Ìsula de Malu Bentu at partetzipadu a s’atòbiu “Valore Natura”, dedicadu a sa tutela e a s’avaloramentu de s’Itàlia peri is àreas marinas protetas, chi s’est fatu in is dies passadas in Roma, in sa Sala Capranichetta in Pratza Montecitorio. 

S’apuntamentu est istadu organizadu dae su WWF Italia e dae sa Onlus Marevivo e at bidu sa presèntzia de Àreas Marinas Protetas dae totu Itàlia, de su Ministru de s’Ambiente e de sa Seguresa Energètica Gilberto Pichetto Fratin, de su Ministru de sa Protetzione Tzivile e de is Polìticas de su Mare Nello Musumeci e de su Presidente de sa Cummissione Agricultura de su Senadu Luca De Carlo.

In sa cunferèntzia ant postu in evidèntzia is crititzidades chi tenent is àreas marinas protetas e is entes gestores.

Presente su Sìndigu Andrea Abis a rapresentare su Comune de Crabas: “Est istadu unu momentu de relatzione istitutzionale e de cunfrontu utilosu meda, fintzas in vista de s’atòbiu cun s’Assessora regionale a s’Agricultura Satta, chi s’at a fàghere giòbia 19 de ghennàrgiu in Casteddu – at decraradu su Sìndigu Abis -. At a èssere s’ocasione pro presentare propostas in contu de su tema de importu de sa pisca in Àrea Marina Proteta”.

In sa mesa de is reladores fiat presente fintzas su Diretore de s’AMP Massimo Marras, chi at faeddadu de su controllu de is àreas marinas protetas mannas, cun un’ interventu chi est istadu apretziadu meda: “S’atòbiu est istadu de importu mannu ca at permìtidu de nàrrere a su Guvernu nou sa situatzione de disàgiu de is àreas protetas e de su sistema chi benit dae is crititzidades aplicativas de sa lege 394/91 – at decraradu su Diretore Marras. - Sa AMP nostra, pro defensare is piscadores professionistas dae sa pisca illegale, dae su 2018 collàborat cun is òrganos de controllu a manera chi siant postas in campu solutziones bonas e chi siat adotadu un’ischema de prus fortzas cun s’agiudu de su Procuradore de sa Repùblica e de su Prefetu de Aristanis”.  

Apretziadu meda s’interventu de su Ministru de is Polìticas de su Mare, chi at marcadu s’importu de sa vitzinàntzia de is polìticas guvernativas a cara a is gestores locales e is comunidades. Soddisfata fintzas s’Assessora cun dèlega a sa Pisca Alessandra Pinna: “S’AMP nostra est istada cramada a rapresentare is crititzidades chi pertocant sa vigilàntzia, una de is atividades prus de importu pro tutelare su patrimòniu naturalìsticu ma fintzas e prus che totu is atividades produtivas comente sa pisca professionale, ma de custas però is àreas marinas protetas, comente s’ischit, non tenent cumpetèntzia dereta. Semus isetende chi si firmet una cunventzione operativa chi at a agiudare is professionistas a fàghere su traballu issoro cun resurtados de importu sòtziu-econòmicos e pro sa tutela de su traballu in mare” at concruidu s’Assessora Alessandra Pinna. A custu atòbiu nd’ant a sìghere àteros, de temas ispetzìficos, e ddu ant a partetzipare torra s’Àrea Marina Proteta Penìsula de su Sinis - Ìsula de Malu Bentu, portende su contributu suo.

(M.G.S.)

 

Tipo di notizia: 
notizie