Orchestra e coro de su Teatru Lìricu, dirìgidos dae Gianna Fratta, su 22 de cabudanni a is 20.30

Image: 

 

 

Giòbia 22 de cabudanni a is 20.30 in sa Pratza Tzentrale de Santu Giuanne de Sinis in Crabas, pro sa rassigna musicale “Un’Isola di Musica 2022”, s’at a fàghere su cuntzertu istraordinàriu de s’Orchestra e de su Coro de su Teatru Lìricu, dirìgidos dae Gianna Fratta (Erba, 1973), chi pro sa prima borta in assolutu arribat a Crabas proponende una serada dedicada a Sinfonie, Intermezzi e Cori famados tratos dae òperas famadas meda, òperas de Giuseppe VerdiGiacomo Puccini e Pietro Mascagni. Su mastru de coro est Giovanni Andreoli.

Su cuntzertu, propostu dae sa Fundatzione Teatru Lìricu de Casteddu est patrotzinadu dae su Comune de Crabas, aprovadu in s’ùrtima giunta comunale, e dae sa Fundatzione Mont’e Prama.

Sighit duncas fintzas in cabudanni sa proposta de intratenimentu a sero chi su Comune donat a is turistas meda chi sunt ancora presentes in Crabas. “A pustis de un’istiu ricu meda de  ispetàculos e de eventos culturales retzimus immoi s’orchestra e su coro de su teatru lìricu, una formatzione prestigiosa meda – at naradu su Sìndigu de Crabas Andrea Abis e Vitze Presidente de sa Fundatzione Mont’e Prama -. Sighimus in su caminu chi amus comintzadu de avaloramentu de is benes culturales ispantosos e de Santu Giuanne de Sinis".

"At a èssere un’ocasione de importu fintzas pro is dischentes de is iscolas – sighit s'Assessore a sa Cultura Carlo Trincas – ca a segunda de is intentziones de sa diretora de su Teatru Lìricu ant a assìstere a una presentada ufitziale de sa serada dedicada a issos. Sa manera giusta pro acostare is giòvanos a una realidade pagu connota  comente cussa de su teatru e de sa mùsica clàssica".

Su cuntzertu faghet parte de sa rassigna de detzentramentu de su Teatru Lìricu e si inserit in una tournée chi at fatu tapa in biddas meda de su territòriu sardu gràtzias a unu finantziamentu regionale.

S’intrada est lìbera finas a cantu bastant is postos.

S’ispetàculu durat un’ora in totu e non b’at pàusa.

(M.G.S.)

 

 

 

 

Tipo di notizia: 
notizie