Istagnu de Crabas: ordinàntzia urgente pro torrare a abèrrere is canales intasados dae is fangos

Image: 

 

 

Cun caràtere de urgèntzia su 22 de trìulas su Sìndigu de Crabas Andrea Abis at emanadu un’ordinàntzia pro torrare a abèrrere is canales chi garantint sa tzirculatzione e ossigenatzione de is abbas de s’istagnu, in particulare in su canale scolmatore, in sa zona denominada “a becco d’anatra” e de is àteros canales de s’istagnu, intasados dae fangos e materiale calcàreu de sa micro-fàuna locale.

“Sa temperadura de s’abba arta meda e sa paga tzirculatzione de is currentes ponent in arriscu mannu s’echilìbriu ambientale, biològicu e duncas s’amparu de s’eco-sistema de is abbas – ispiegat su Sìndigu Andrea Abis -. Est de importu mannu a si mòvere luego pro chi non bi siat s’arriscu de una catàstrofe sanitària e ambientale comente cussa chi fiat capitada annos a como, cando pro una mudatzione improvisa de is cunditziones de vitalidade de s’istagnu fiant mortos totu is pisches”.

Su Sìndigu pro tantu at ordinadu chi s’Ufìtziu Tècnicu comunale fatzat a manera urgente s’interventu de pulitzia dae is fangos chi sunt in is canales cun una dèroga momentànea in contu de su tratamentu de su refudu, chi pro como s’at a pònnere in sa riva, pro tutelare bene s’ambiente. A pustis s’at a fàghere sa verìfica de is materiales e s’at a valutare sa gestione definitiva de is fangos cun is finantziamentos de dragàgiu dedicados dae sa programmatzione territoriale.

Pro chie est interessadu s’ordinàntzia de su Sìndigu est sa n.106 de su 21/07/2022.

(M.G.S.) 

Tipo di notizia: 
notizie