ISCOBERTA NOA IN MONT’E PRAMA. Essint a foras dae sa terra duas istàtuas noas de Gigantes

Image: 

 

 

S’iscoberta de duas istàtuas noas in Mont’e Prama cunfirmat sa calidade manna de su traballu fatu dae sa Subrintendèntzia de Casteddu – narat su Presidente de sa Fundatzione Mont’e Prama Anthony Muroni a pagos minutos dae sa nova de is progressos fatos in sa campagna de iscavu noa, comintzada in abrile a cura de sa Subrintendèntzia Archeològica, bellas artes e paesàgiu de Casteddu e Aristanis.

“A nùmene de sa Fundatzione fatzo is cumplimentos prus sintzeros a sa Subrintendente Monica Stochino e a s’archeòlogu Alessandro Usai, diretore iscientìficu de is iscavos - sighit Muroni -. Su traballu de chirca, cunservatzione e amparu andat paris cun cussu de avaloramentu e promotzione: so seguru chi subra de custu, Ministeru e Fundatzione, ant a cunfirmare de ischire traballare paris a manera frutuosa, comente ant fatu in custos meses. Nois, chi amus giai tentu finantziamentos  mannos dae sa Regione Autònoma de sa Sardigna, semus prontos a portare a sa mesa tècnica unu progetu de restàuru didàticu mannu, abertu a su pùblicu - coordinadu dae sa Subrintendèntzia – de fàghere in su Museu de Crabas”.

Monte Prama est una miniera manna chi oe torrat àteras richesas, gràtzias a sa campagna de iscavos curada dae sa Subrintendèntzia e chi sunt de importu mannu pro cumprèndere su passadu mitològicu nostru – sunt is paràulas espressadas dae su Sìndigu de Crabas Andrea Abis -. Tenimus programmas de importu chi como si podent fàghere cun sa Fundatzione Mont’e Prama, e so semper prus cumbintu chi siat istadu unu sèberu bonu”.

(M.G.S.)

Tipo di notizia: 
notizie