Cuncursu Fotogràficu pro sa festa de Santu Srabadoi de Sinis – Cursa de is Iscurtzos 2022

Image: 

 

 

In ocasione de sa festa in onore de Santu Srabadoi de Sinis, s’Amministratzione comunale promovet unu Cuncursu fotogràficu chi pertocat sa Cursa de is Iscurtzos 2022, previdida pro su 3 e su 4 de cabudanni.

Is partetzipantes ant a dèpere imbiare màssimu tres fotografias cun risolutzione de nessi 600 dpi cun unu tìtulu e chi siant istadas iscatadas in s’editzione 2022 de sa Cursa de is Iscurtzos.

Is fotografias finalistas ant a èssere seletzionadas dae una giuria nominada dae su Comune chi s’at a riunire a pustis de sa festa pro proclamare is binchidores de su cuncursu.

Pro is primos tres classificados sunt prevididos unu primu prèmiu de 500 èuros, unu segundu prèmiu de 300 èuros e su de tres de 200 èuros.

“Cherimus tzelebrare s’eventu in sa manera mègius, fintzas cun “fermo immagine” chi potzant trasmìtere totu is emotziones de is protagonistas de sa Cursa – at naradu s’Assessore a sa Cultura, Ispetàculu e Turismu Carlo Trincas -. Custu cuncursu tenet su valore de premiare sa bellesa de si iscatos e de nos regalare sa memòria de su chi at a bènnere, a manera chi in totu s’annu si potzat contare cun is fotografias una cosa chi si faghet in cabudanni ma faghet parte de sa vida de is crabarissos pro meses meda in s’annu”.

Cun is fotografias imbiadas s’amministratzione a pustis at a pòdere fàghere mustras, installatziones e reportage fotogràficos in sa manifestatzione in ue chentinas de òmines bestidos cun un’àbidu biancu, portant currende a pees nudos s’istàtua de Santu Srabadoi dae Crabas a su villàgiu.

Totu is òperas retzidas ant a pòdere èssere impreadas dae su Comune pro fàghere propaganda a su territòriu. A is partetzipantes at a èssere semper garantidu su deretu a  èssere tzitados comente “Autores” de is fotografias onni borta chi ant a èssere impreadas.

Is materiales depent èssere imbiados in intro de su 6 de cabudanni 2022 a s’indiritzu mail cun Wetransfer, info1@assoentilocali.it, iscriende in ogetu: “Contest Fotografico Corsa degli Scalzi 2022– invio foto”.

Pro àteras informatziones si podet agatare s’Avisu publicadu in su situ istitutzionale de su Comune de Crabas.

Ph. Gloria Musa

(M.G.S.) 

 

Tipo di notizia: 
notizie