Crabas at tentu pro su segundu annu su prèmiu Chimbe Velas de Legambiente

Image: 

 

 

Pro su segundu annu a fila Crabas, cun sa Penìsula de su Sinis e s’ìsula de Malu Entu, bidet torradu a cunfirmare su prèmiu de importu mannu de is Chimbe Velas de Legambiente e Touring Club Italiano.

S’est fata su 24 de làmpadas  sa presentada e sa premiatzione in su logu bellu meda de s’Ìsula de Capri, in su tzentru Cungressos Paradiso di Anacapri, in duas dies organizadas dae Legambiente e CNR pro fàghere su puntu in contu de is polìticas natzionales pro is ìsulas e is costeras e in contu de is resursas prevìdidas dae su PNRR pro custos territòrios.

Ocannu puru a su primu postu de sa classìfica figurat sa Sardigna, cun ses cumprensòrios turìsticos a Chimbe Velas. In prus de Crabas retzint su prèmiu fintzas is terras chi andant dae sa Baronia de Posada a sa Gallura costera, dae su cumprensòriu de Baunei a su litorale de Chia, pro arribare a su litorale de sa Pianalza in sa costa otzidentale. Sighint Toscana e Pùglia, Sitzìlia e Campània e Basilicada e Ligùria.

“Pro Crabas est una cunfirma de importu – at decraradu cuntentu su Sìndigu Andrea Abis -. S’impignu de s’Amministratzione, gràtzias a su traballu de su diretore e de su personale de s’Àrea Marina Proteta de su Sinis est mannu meda e custu reconnoschimentu, pro su segundu annu a fila, mustrat s’aprètziu mannu pro sa calidade de s’ambiente de sa gestione nostra de is plajas chi sunt oferidas a unu turismu cussente de is valores naturalìsticos, de su paesàgiu e culturales de fundamentu in intro de una riserva marina. Cunservatzione e cura de su paesàgiu, pulitzia de su mare e de is dunas, plajas lìberas, òrdine, seguresa e decoro de is plajas, collegamentu cun is sitos culturales.  Is Chimbe Velas rapresentant pro nois sa tzertificatzione de custos valores”.

Intre is indicadores chi contribuint a valutare su prèmiu Chimbe Velas, in prus de sa salubridade de is abbas, ddu est fintzas sa presèntzia de fundales interessantes meda pro chie faghet atividade subacquea e sa presèntzia de logos de interessu istòricu culturale comente museos e sitos archeològicos.

Crabas rapresentat in totu e pro totu is particularidades de is sitos de prègiu de Legambiente – agiunghet su primu tzitadinu -, ca a is bellesas de is costas e de su mare agiunghet unu patrimòniu ispantosu  de benes culturales e archeològicos cun su situ de Tharros e su museu tzìvicu, in ue sunt custoidos is Gigantes de Monte Prama, subra totus. Custu logu turìsticu de importu si cumpletat cun sa calidade manna de s’eno-gastronomia e is traditziones”.

Cuntenta meda fintzas Marta Battaglia, sa Diretora de Legambiente Sardigna: “Sa costera de Crabas dae s’annu passadu si agiunghet de su totu a is Cumprensòrios Chimbe Velas de sa Sardigna, una cunfirma chi at permìtidu de crèschere su nùmeru de is logos sardos chi retzint su prèmiu, pro tempus meda basadu subra àteros chimbe territòrios virtuosos. Custu dinamismu nos faghet praghere meda ca est fintzas gràtzias a s’impignu de logos comente Crabas chi sa Sardigna abarrat cun firmesa a is primos postos de sa classìfica de Legambiente”.

In sa mangianada su Touring Club at presentadu sa ghia “Il mare più bello 2022”, in ue is plajas de Crabas sunt intre is mègius de Itàlia.

(M.G.S.)

 

 

Tipo di notizia: 
notizie