Concruidu su progetu “Amici del Fratino”: immoi s’ispètzie proteta tenet un’àrea de tutela pro sa riprodutzione

Image: 

 

 

Est finidu su progetu “Amici del Fratino 2022”, fatu dae s’Àrea Marina Proteta Penìsula de su Sinis Ìsula de Malu Bentu cun su co-finantziamentu de s’Assessoradu regionale de sa Difesa de s’Ambiente, chi at permìtidu de fàghere una filera de atividades educativas e de sensibilizatzione pro sa defensa e sa cunservatzione de sa bio-diversidade, cun atentu particulare a sa defensa de su Fratino, un’esemplare de pugione chi faghet parte de sa Lista Rossa IUCN pro s’Itàlia comente ispètzie in perìgulu.

Ant traballadu paris cun s’AMP in is atividades, is educadores espertos de sa Cooperativa “Nel Sinis” de Antonio Ricciu, su Ceas de Ingurtosu  e Forestas – Servìtziu territoriale de Aristanis.

A partire dae martzu e in s’istiu sunt istadas meda is atividades chi ant interessadu is pitzocos de is iscolas e is mìgias de bagnantes chi ant prenu is plajas de sa costa de su Sinis, cun sa punna de sensibilizare canta prus gente si podet in contu de s’esistèntzia de custa ispètzie proteta e de s’importu de su rispetu de su tempus delicadu de sa nidificatzione, chi est in unas cantas àreas ispetzìficas de su territòriu.

In abrile, cun sa prima fase, su diretore de s’Àrea Marina Proteta Massimo Marras paris cun Gabriele Pinna, voluntàriu de sa Lipu, ant mandadu a dae in antis un’atividade de formatzione interessende s’Istitutu cumprensivu de Crabas. Is dischentes de is classes 1°A, 1°B e 1°C ant partetzipadu bene meda a is atividades e ant retzidu is libreddos  in ue sunt ispiegados is cumportamentos de tènnere pro cunservare  e respetare custos pugiones.

Pròpiu is dischentes, cun s’agiudu mannu de is voluntàrios Lipu e de is operadores de s'Agentzia Forestas, ant fatu un’Àrea de tutela de su fratino in sa plaja de Mariermi, ponende bator cartellos de informu, fatos cun materiale naturale, in contu de su progetu e de is pràticas bonas de sighire.

Treghentos opùsculos e milli libreddos sunt istados distribuidos in is plajas pro sensibilizare chie at passadu is dies in su mare de su Sinis e deghe mìgia tiageddas informativas sunt istadas dadas a is atividades ritzetivas.

“Unu progetu in favore de s’ambiente e de s’òmine, a manera particulare de is giòvanos, chi si sunt postos a disponimentu  a manera ativa e cun entusiasmu faghende.si porta-boghe de unu programma de tutela chi tenet unu significadu mannu, chi est prus de s’atividade de propaganda in favore de custos pugiones. Est de importu mannu a trasmìtere is valores de su rispetu de su territòriu in intro de una riserva marina pro chi ddoe siat una difusione semper prus manna de is abitùdines bonas, pro dare unu tempus benidore a totu is ispètzies animales e vegetales chi nde faghent parte” at naradu sa Vitze-sìndiga Alessandra Pinna.

“Semus cuntentos ca gràtzias a custu progetu semus resurtados a interessare giòvanos e gente manna, faghende.ddis a connòschere un’ispètzie chi faghet parte de s’eco-sistema de su logu, bortas meda pagu connota e pro tantu galu prus in arriscu. Comente Àrea Marina Proteta ogni annu istabilimus su calendàriu de is dies ecològicas leende comente puntu de riferimentu pròpiu su tempus de nidificatzione de su fratinu, a manera de garantire sa riprodutzione. Dae ocannu amus fatu unu passu a dae in antis in favore de su fratinu e de s’Àrea Marina” at naradu su diretore Massimo Marras.

(M.G.S.)                                                                                                                                  

 

 

Tipo di notizia: 
notizie