Atretzadura de pisca pantasma. Recuperadas nassas meda e unu motore “fuoribordo” betzu

Image: 

 

 

Est acabadu eris a mangianu su progetu “Ghost gear”, fatu dae s’Àrea Marina Proteta Penìsula de su Sinis Ìsula de Malu Entu paris cun su WWF pro minimare s’impatu de sa pisca pantasma, recuperende atretzos abbandonados o pèrdidos in is fundales. Is operatziones ant bogadu a campu unu motore “fuoribordo”  betzu, chi fiat in mare dae paritzos annos, de seguru pèrdidu dae calicunu e una nassa betza, custa puru pèrdida dae tempus meda. Ambos duos fiant apogiados subra sa Posidonia otzeànica, e pro tantu su fatu de ddos àere agatados cun su sonar ispetziale chi ant impreadu est unu resurtadu bonu meda. Su progetu at bogadu a campu fintzas deghessete nassas noas, postas in mare aposta pro atividades de pisca illegale, chi nche sunt istadas leadas paris cun àteros materiales cun is barcas de pisca e secuestrados dae sa Capitaneria de Portu.

Ghost gear s’est pòdidu fàghere gràtzias a s’agiudu de totu is fortzas postas in campu pro sa defensa de s’eco-sistema marinu. In prus de AMP e WWF fiant presentes is sommotzadores de sa Capitaneria de Portu de Aristanis, is piscadores de Crabas, is operadores de su Korakodes Diving, chi in is sete dies de atividade ant traballadu paris pro agatare is zonas in ue ddu aiat prus probabilidades de agatare materiales pèrdidos o fuliados, comente retzas e nassas de pisca, atretzos chi sighint a traballare in su tempus, impresonende su pische.

Su  grupu de su WWF Germània, dae tempus meda impignadu a isnetiare su Mare Bàlticu dae is atretzos pantasma cun tecnologias noas, at testadu pro sa prima borta in su Mediterràneu s’istrumentatzione sonar pro identificare is atretzos prus a lestru.

Fiat presente pro su monitoràgiu de is operatziones fintzas sa motonave Yoda della Castalia, cuntzessa dae su Ministeru de sa Transitzione Ecològica in s’àmbitu de is operatziones  contra a s’incuinamentu.

S’operatzione de recùperu est istada fata in intro de su Golfo de Aristanis, a penas foras dae s’AMP ma in intro de s’àrea ZSC Ìsula de Malu Entu e Catalanu proteta dae sa Diretiva Habitat.

Cuntentos meda pro su resurtadu is promotores de su progetu e is amministradores locales.

“Custa chida de traballu pro testare in su  Mediterràneu s’istrumentatzione sonar de su WWF est istada de profetu, nos at permìtidu de fàghere unu traballu lestru de controllu de su fundale marinu e de agatare atretzos de pisca e refudos lassados in mare e destinados a fàghere dannu  pro tempus meda. Is plàsticas de is retes e de is nassas in fatis non si pùdrigant cun fatzilidade ma resistint intreas pro annos meda” at ispiegadu su  diretore de s’Àrea Marina Proteta Massimo Marras.

“S’unione intre is piscadores e s’Àrea Marina locale est un’esempru de ammirare de is polìticas de gestione impare chi cherimus promòvere semper prus pro tutelare su hàbitat marinu. S’obietivu prefissadu est cussu de pònnere a frutu atividades collaterales chi potzant tènnere efetos bonos non solu pro su presente ma fintzas pro su tempus chi at a bènnere de sa riserva marina” at naradu sa Vitze-sìndiga Alessandra Pinna, Assessora delegada a sa Pisca.

(M.G.S.) 

 

 

Tipo di notizia: 
notizie