Annullada pro su tempus malu sa die ecològica “Puliamo l’Isola! 2022”

Image: 

 

 

Sa die ecològica “Puliamo l’Isola! 2022” previdida pro domìniga 18 de cabudanni est istada annullada pro su tempus malu, chi non permitit de trasportare is partetzipantes in mare. Immoi no est possìbile a la rinviare, ca is sotziedades de trasportu a cara a s’ìsula suspendent is atividades pro sa firmada de s’ierru. S’apuntamentu duncas est rimandadu a s’annu chi benit.

Lu dat a ischire su diretore de s’Àrea Marina Proteta Penìsula de su Sinis – Ìsula de Malu Entu, Massimo Marras.

“Semus dispràghidos, sa die ecològica in s’Ìsula de Malu Entu est oramai un’apuntamentu isetadu e partetzipadu, programmadu pro su mese de cabudanni respetende is ispètzies chi faghent su niu in cussa àrea. Pròpiu pro custu motivu est però fintzas prus sugetu a rinvios pro is maregiadas. Ddu aiat prus de noranta adesiones, isperamus chi una partetzipatzione gosi manna si potzat repìtere s’annu chi benit” at naradu Marras.

In custas oras su personale AMP est avisende totu is chi aiant dadu s’adesione in su form online chi sa die ecològica non s’at a fàghere.

In su 2021 prus de chentu voluntàrios, paris cun su Sìndigu  Andrea Abis, is Assessores, is Cussigeris e is operadores de s’Àrea Marina Proteta, armados de bustas pro sa regorta diferentziada, fiant isbarcados in s’ìsula chi est in una de is zonas prus pregiadas de s'Àrea Marina de su Sinis.

Fiant istados regortos giai dughentos-trinta chilos de refudos. De importu mannu fiat istadu s’impignu de s’AMP pro su trasportu dae sa zona de Cala Maestra de una meda de su 2013 e de is restos de duas boas arenadas dae su 2004 chi pesaiant giai seschentos-chimbanta chilos. Un’operatzione ispetaculare chi si fiat fata cun s’agiudu de un’elicòteru, artziende in seguresa siat is boas, siat sa meda, pilone longu deghe metros e pesante prus de una tonnellada.

In is dies ecològicas 2022 nde sunt istados bogados dae su mare 550 chilos de refudos. Comente ogni annu su prus fiat plàstica.

(M.G.S.)

 

Tipo di notizia: 
notizie