“Sa die de sa Memòria: s’importu de s’ammentu ”. In Crabas una die dedicada a is iscolas

Image: 

 

 

In ocasione de sa die de sa Memòria, chenàbura 27 de ghennàrgiu, s’Amministratzione ghiada dae su Sìndigu Abis at programmadu unu mangianu dedicadu a is dischentes de is iscolas segundàrias de primu gradu e de sa classe cuinta de sa primària.

Is dischentes ant a tènnere s’ocasione de arresonare in contu de su dramma de sa Shoah paris cun sa dotora Eleonora Ninu, psicòloga, psicoterapèuta e presidente de s’Osservatòriu Cybercrime Sardigna chi, cun unu limbàgiu miradu, ddis at a faeddare de is temàticas de sa memòria, de sa discriminatzione, de is pregiudìtzios, firmende.si subra s’importu de s’ammentu comente testimonia e ammonimentu pro is generatziones noas, a manera chi non si  torrent a fàghere mai prus is errores mannos de su tempus passadu.

A pustis s’assòtziu culturale “Il Crogiuolo” at a presentare “Una Bambina e basta”, ispetàculu teatrale pro boghe chi rètzitat e arpa, e descriet dae su puntu de vista de una pitzinna ebrea sa bregùngia de s’aplicatzione de is leges ratziales in Itàlia.

“Cherimus acumpangiare is pitzocos in unu percursu utilosu, pro chi non siant ebbia custodes de sa memòria, ma cumprendant su valore de s’inclusione in ogni setore, fintzas in is bancos de iscola, logu de crèschida pro is giòvanos nostros” at ispiegadu su Sìndigu Andrea Abis.

“Partende dae sa Shoah is pitzocos ant a pòdere tènnere cussèntzia de is formas de violèntzia e discriminatzione de oe, comente pro esempru su bullismu e su cyberbullismu, atzetende is diversidades comente fonte de irrichimentu” at decraradu s’Assessore a sa Cultura Carlo Trincas.

A is 17, in is locales de carrera Matteotti, sa Biblioteca comunale organizat unu merie a tema pro un’àteru aprufundimentu fintzas dae su puntu de vista pedagògicu. S’ant a lèghere is libros "Otto, biografia di un orsacchiotto" de Tom Ungerer, "L'albero di Anne" de Iréne Cohen-Janca e "La portinaia Apollonia" de Lia Levi.
Pro iscritziones, telefonare a su nùmeru 0783 290321 o iscrìere unu messàgiu a is “social” de sa biblioteca.

(M.G.S.)

Tipo di notizia: 
notizie