“Nuvole in Viaggio”. Inaugurada in Crabas s’installatzione artìstica fata dae is istudiantes de su Litzeu Artìsticu de Aristanis

Image: 

 

 

Sàbadu mangianu in sa pratza Ravenna in Crabas est istada inaugurada s’installatzione fata dae is istudiantes de su Litzeu Artìsticu Carlo Contini de Aristanis chi rapresentat sa parte de acabu de su progetu “Nuvole in Viaggio”, cun su cale is istudiantes ant bìnchidu su cuncursu regionale “Graziano Deiana” arribadu a sa de IV editziones e dedicadu a is Istitutos segundàrios de II gradu.

Su progetu est istadu fatu cun su contributu de sa Regione Sardigna e paris cun su Comune de Crabas e s’Istitutu cumprensivu de sa bidda, a pustis de sa firma de una cunventzione intre su Comune de Crabas e s’istitutzione iscolàstica pro fàghere percursos pro s’isvilupu de is cumpetèntzias trasversales e s’orientamentu, firmada in su mese de abrile.

In sa pratza de su Comune is pitzocos ant ismuntadu s’installatzione artìstica, chi cunsistit in una nue istilizada manna 2.30 mt pro 1.85 mt, fata cun un’istrutura de ferru e cumposta dae tantas tèsseras piticas de tzeràmica e linna de 15 pro 20 cm.

“Ogni tèssera faghet parte de una totalidade ma a su matessi tempus rapresentat un’òpera de arte indipendente e contat a manera simbòlica su biàgiu de una persona chi at cambiadu bidda o natzione. Calicuna inghìriat a giru de se, dende un’ispessore visivu prus mannu a s’òpera chi si podet osservare dae ambas partes, de fronte e a dae segus” at ispiegadu Emanuela Deidda, coordinadora de su progetu, presente in sa mangianada paris cun sa referente de s’àrea culturale de su Litzeu Artìsticu Sabrina Oppo.

“Su tema printzipale de s’òpera est pròpiu su biàgiu, intesu in su significadu de s’emigratzione e immigratzione in s’ìsula nostra, fenòmenu chi bidet protagonistas siat is giòvanos sardos, chi si movent a cara a àteros logos, siat is istràngios meda chi arribant a Sardigna in chirca de una vida mègius” ant ispiegadu Deidda e Oppo.

Custa temàtica nos faghet fàghere cunsideros prus generales in contu de s’istòria de s’òmine chi dae semper est istada caraterizada dae ispostamentos de gente, a sa sola, in grupos e, a bortas, de pòpulos intreos dae una regione a s’àtera, chirchende una vida mègius. Intre is motivos printzipales de is movimentos migratòrios su prus comune est de seguru cussu econòmicu, paris cun àteras càusas comente is gherras, is cunflitos sotziales, is intolleràntzias religiosas e is cambiamentos de su clima.

 “Is temas de s’integratzione e de s’inclusione sunt dae annos meda de importu mannu in su traballu de s’istitutu nostru – at afirmadu Pino Tilocca, Dirigente IIS De Castro -. Giai in su 2019 amus fatu in Aristanis in sa pratza de su Litzeu Clàssicu una prima installatzione artìstica. Cun s’òpera de arte de pratza Ravenna sighimus su traballu nostru dende atentu a su tema de su biàgiu, in ue is pòpulos cun culturas diversas s’atòbiant sena s’iscontrare mai”.

Su progetu naschet cun unu vìdeu (chi si podet bìdere in su link: https://youtu.be/P0M2uDd5McQ ) fatu dae is istudiantes de su Litzeu Artìsticu C. Contini in sa prataforma Google Meet, in ue sunt contados contos meda de biàgios. Protagonistas sunt pròpiu is giòvanos, chi s’ispostant pro sèberu o pro netzessidade, pro istùdiu, pro passiones, pro sentidos o pro bisòngiu. Sa nue est sa metàfora de custu biàgiu: is giòvanos peri una nue de cuntatos virtuales contant is ideas issoro.

Is istudiantes ant  manifestadu sa visione issoro in contu de immigratzione e emigratzione de is òmines immaginende.ddos lìberos de si mòvere in su pianeta terra sena barrieras e cunfines, chirchende sa vida sognada, una vida digna de èssere bìvida. In su vìdeu narant: “Semus comente nues chi biàgiant in custu chelu nostru: ognuna curret in fatu a is SOGNOS suos, fuit dae is TIMORIAS suas, totus LÌBERAS de bolare sena barrieras e cunfines chirchende semper sa FELITZIDADE”.

S’idea de su biàgiu proposta in su vìdeu premiadu est istada torrada a propònnere pròpiu cun s’installatzione artìstica fata dae is  istudiantes a indirìtzu Design de s’arredamentu e de sa linna e Design de sa tzeràmica.

 “Amus atzetadu luego sa proposta de su litzeu Carlo Contini basada subra sa collaboratzione cun is pitzocos e is mastros, cunsiderende custu progetu porta boghe de unu messàgiu de fundamentu de inclusione, integratzione e libertade  – at naradu su Sìndigu Andrea Abis -. S’installatzione chi est istada inaugurada in pratza Ravenna est pro nois unu modu de pònnere is periferias a su tzentru de is atziones de decoru, cultura e bellesa urbana, unu modu pro acostare is prus giòvanos, a partire dae is pitzocos de is iscolas mèdias, chi oe sunt presentes, a is temas mannos de su tempus nostru”.

“Est cun praghere mannu chi oe bidimus s’acabu de su progetu chi at bìnchidu su de 4 Avisos “Graziano Deiana”. Semus seguros chi fintzas custa opera noa at a contribuire a favorèssere unu clima de rispetu pari pari, sena distintzione peruna de gènere o de ratza, in intro de is iscolas nostras. In contu de custos valores sa Regione at a sighire a investire semper fintzas cun avisos noos, comente at fatu cun s’avisu nou 2022 chi isperamus chi tèngiat sa matessi partetzipatzione chi amus tentu pro is editziones passadas” narat Sandro Ortu, Diretore de su Sevìtziu Tzitadinos, Assessoradu regionale de su Traballu.

Ant pigadu parte a sa mangianada is pitzocos de sa II A e II B de sa segundària de primu gradu de s’Istitutu Cumprensivu de Crabas. “Pigamus parte cun praghere mannu – narat su Dirigente Iscolàsticu Paolo Figus -. Amus afrontadu pro tempus meda is temas de s’acoglièntzia e de sa solidariedade in is cunfrontos de is migrantes e s’annu passadu amus acoltu is pitzinnos ucrainos chi fuiant dae sa gherra. Si tratat de temàticas chi tocant in su profundu ca faghent parte de sa cultura nostra de sardos, pòpulu de emigrantes e pòpulu chi ischit dare ospitalidade. S’iscola tenet su còmpitu de importu mannu de trasmìtere sa connoschèntzia e dat is istrumentos netzessàrios pro cumprèndere custos fenòmenos sotziales e culturales. S’esempru de is istudiantes prus mannos at a èssere de seguru un’incoragiamentu pro is pitzocos nostros pro afrontare custos temas fintzas in forma artìstica, mudende su pensamentu in patrimòniu visìbile, chi apartenet a totus, comente in su casu de s’installatzione”.

Fiant presentes a s’inauguratzione fintzas Nunzia Pica, rapresentante pro sa Regione Sardigna e, pro Crabas, sa Vitze-Sìndiga Alessandra Pinna, Laura Celletti, Assessora a is Polìticas Sotziales, Sanitàrias e Assistentziales, Enrico Giordano Assessore a s’Urbanìstica e Traballos Pùbblicos, Ferdinando Sechi, Cussigeri cun dèlega a s’Istrutzione.

A s’acabu de sa manifestatzione sunt istados donados a is classes de s’Istitutu cumprensivu de Crabas origami piticos fatos dae is istudentes de sa presone de Màssama. Sunt istados custos a si ocupare de sa fase finale de su progetu, persones intre is 20 e is 70 annos chi ant apretziadu sa possibilidade de dare su contributu issoro, agatende “su regalu de unu chigioneddu de libertade. Ogni iscola chi s’aperit – ant naradu -, serrat pro calicunu sa probabilidade de intrare a presone”.

(M.G.S.)

 

 

 

Tipo di notizia: 
notizie