S’Assessoradu a sa Cultura de su Comune de Crabas, cun sa Biblioteca Comunale paris cun is mastros de s’Istitutu cumprensivu, proponet unu cuncursu de promotzione de sa letura comente contributu a sa crèschida culturale e umana de is pitzinnos e pitzocos.
Su cuncursu si dividit in duas setziones: Pitzinnos, dedicada a is istudiantes de s’iscola Primària e Pitzocos, dedicada a is istudiantes de s’iscola Segundària de primu gradu. Is partetzipantes devent lèghere nessi tres libros intre is meses de maju e nadale de su 2022, seberende liberamente intre is propostas literàrias chi ddoe sunt in sa biblioteca, fintzas cussigiados dae is mastros issoro. Su cuncursu at a premiare cun bonos pro comporare libros is tres pitzocos chi ant a àere lèghidu de prus in is meses inditados.
Pro incoragiare una partetzipatzione prus manna, pro ogni libru lèghidu is pitzocos ant a pòdere cundivìdere in is social sa fotografia cun una retzensione issoro curtza, “taggando” is canales Facebook e Instagram de sa biblioteca.
“S’obietivu est cussu de sensibilizare is giòvanos a su valore de sa letura, superende is dificultades chi oe sunt, bortas meda, acapiadas a una digitalizatzione manna, ma semper andende.ddis incontru fintzas cun s’agiudu de suportos atuales e faghende a manera de fàghere a cumprèndere chi su libru est una richesa de iscobèrrere – narat sa cussigera delegada a is atividades de sa biblioteca Paola Deiala -. Est de importu mannu sa collaboratzione promòvida dae sa biblioteca intre is agentzias educativas de su territòriu, a manera particulare cun s’iscola, pro abbalorare sa tzentralidade de su libru comente istrumentu de iscoberta de su mundu, de maturatzione de capatzidade de anàlisi e ispìritu crìticu”.
Cun s’atividade in programma s’ismànniat s’invitu a sa letura in sa biblioteca a manera allegra, cun unu pagu de cumpetitzione sana.
Is premiatziones, in bonos pro comporare libros, s’ant a fàghere cun un’eventu de agabbu, a sa presèntzia de unu de is iscritores preferidos dae issos . Pro connòschere is detàllios de s’initziativa e su regulamentu de su cuncursu, si podet domandare in sa Biblioteca de Crabas, in carrera Matteotti e telefonare a su nùmeru 0783 290321.
(M.G.S.)